Day 01 - Grammar Lessons | ஆங்கில இலக்கணம்

எமது ஆங்கில வகுப்பின் (Day 01) முதல் நாள் ஆங்கில இலக்கணப் பாடங்களே இவையாகும்.

Day 01 - Grammar Lessons

- English Alphabet
ஆங்கில எழுத்துக்கள்

- Vowels & Consonants 
உயிர் எழுத்துக்கள் மற்றும் மெய் எழுத்துக்கள்

- Nouns & Verbs
பெயர்ச்சொற்கள் மற்றும் வினைச்சொற்கள்

- Singular & Plural Words
ஒருமை மற்றும் பன்மை சொற்கள்

கீழே ஒவ்வொரு தலைப்பையும் தனித்னியாகப் பார்க்கலாம்.

English Alphabet

ஆங்கில எழுத்துக்கள்

ஆங்கில மொழியில் மொத்தமாக 26 ஆங்கில எழுத்துக்கள் உள்ளன. அவை,

A, B, C, D, E, F, G, H, I, J, K, L, M, N, O, P, Q, R, S, T, U, V, W, X, Y, Z

ஆங்கிலத்தில் இந்த 26 எழுத்துக்களையும் இரண்டு விதமாக எழுதலாம்.

01. Capital letters (பெரிய எழுத்துக்கள்)

A, B, C, D, E, F, G, H, I, J, K, L, M, N, O, P, Q, R, S, T, U, V, W, X, Y, Z

02. Small letters (சிறிய எழுத்துக்கள்)

a, b, c, d, e, f, g, h, i, j, k, l, m, n, o, p, q, r, s, t, u, v, w, x y, z

சிலர் ஆங்கிலத்தில் சிறிய எழுத்துக்களை 'simple letters' எனவும் அழைப்பார்கள்.

அதேபோல் கணினி மற்றும் தொழில்நுட்பத்துடன் தொடர்புடைய சூழலில் பெரிய எழுத்துக்களை 'uppercase' எனவும் சிறிய எழுத்துக்களை 'lowercase' எனவும் அழைப்பார்கள். 

Vowels & Consonants

உயிர் எழுத்துக்கள் மற்றும் மெய் எழுத்துக்கள்

ஆங்கிலத்தில் ஆங்கில எழுத்துக்களின் பயன்பாட்டை அடிப்படையாகக் கொண்டு அவை இரண்டு வகையாகப் பிரிக்கப்டுகின்றன.

01. Vowels (உயிர் எழுத்துக்கள்)

ஆங்கிலத்தில் உயிர் எழுத்துக்கள் 05 உள்ளன. 

அவை - A, E, I, O, U 

A, B, C, D, E, F, G, H, I, J, K, L, M, N, O, P, Q, R, S, T, U, V, W, X, Y, Z

02. Consonants (மெய் எழுத்துக்கள்)

ஆங்கிலத்தில் உள்ள 26 எழுத்துக்களில் மேலே குறிப்பிடப்பட்ட 05 உயிர் எழுத்துக்களும் தவிர்ந்த ஏனைய 21 எழுத்துக்களும் மெய் எழுத்துக்கள் (Consonants) என அழைக்கப்டுகின்றன. 

அவை,

B, C, D, F, G, H, J, K, L, M, N, P, Q, R, S, T, V, W, X, Y, Z

A, An ஆகிய சொற்களின் பயன்பாடு...

ஆங்கில உயிர் எழுத்துக்கள் (Vowels) பற்றிக் கற்றுக்கொள்ளும் போது A, An ஆகிய சொற்களின் பயன்பாடு பற்றியும் முக்கியமாகக் கற்றுக்கொள்ள வேண்டும். இவற்றை ஆங்கிலத்தில் பெயர்சொற்குறிகள் (Articles) என அழைப்பார்கள்.

நாம் தமிழில் ஒரு விடயத்தை மட்டும் குறிப்பிட 'ஒரு' அல்லது 'ஓர்' ஆகிய இரண்டு சொற்களையும் பயன்படுத்துவோம். நாம் அதற்காக ஆங்கிலத்தில் பயன்படுத்தும் சொற்கள் 'A' அல்லது 'An' ஆகும். 

ஒரு ஆங்கில சொல்லை உச்சரிக்கும் போது அந்த ஆங்கில சொல் ஆரம்பத்தில் தரும் ஒலி அல்லது சப்தம் ஓர் உயிரெழுதின் ஒலியாக இருக்கும் சந்தர்ப்பங்களில் நாம் அங்கே A என்பதற்குப் பதிலாக An எனும் சொல்லைப் பயன்படுத்த வேண்டும். 

உதாரணம்....

ஒரு யானை - an elephant.

ஒரு குடை - an umbrella.

ஒரு மணித்தியாலயம் - an hour

ஒரு முட்டை - an egg

அவ்வாறின்றி ஒரு ஆங்கில சொல்லை உச்சரிக்கும் போது அந்த ஆங்கில சொல் ஆரம்பத்தில் தரும் ஒலி அல்லது சப்தம் ஓர் உயிரெழுதின் ஒலியாக இல்லாமல் ஒரு மெய்யெழுத்தின் ஒலியாக இருக்கும் சந்தர்ப்பங்களில் நாம் அங்கே A எனும் சொல்லைப் பயன்படுத்த முடியும். 

உதாரணம்....

ஒரு பூனை - a cat.

ஒரு மேசை - a table.

ஒரு வீடு - a house

ஒரு கதிரை - a chair

Nouns & Verbs

பெயர்ச்சொற்கள் மற்றும் வினைச்சொற்கள்

Nouns (பெயர்ச்சொற்கள்)

இவ்வுலகில் அல்லது இந்தப் பிரபஞ்சத்தில் உள்ள அனைத்து விடயங்களுக்கும் ஒரு பெயர் இருக்கும். உயிரிலுள்ளவையாக இருந்தாலும் சரி உயிரற்றவையாக இருந்தாலும் சரி, அனைத்திற்கும் ஒரு பெயர் உண்டு. 

அவ்வாறான பெயர்களைக் குறிப்பிடப் பயன்படும் சொற்களையே நாம் ஆங்கிலத்தில் Nouns (பெயர்ச்சொற்கள்) என அழைக்கிறோம்.

உதாரணம்....

Car, House, Pen, Man, Woman, Dog, Cat, Table, Chair, India, Sri Lanka, London, Dubai, School, Tamil, English, Hindi

Verbs (வினைச்சொற்கள்)

பொதுவாக ஒரு செயலை அல்லது வினையை விவரிக்கும் சொற்களை நாம் வினைச்சொற்கள் எனலாம். 

உதாரணம்....

Work, Write, Run, Read, Go, Come, Cook, Fly, Cut, Swim, Learn, Do, Speak

ஆங்கிலத்தில் Verb (வினைச்சொல்) என்பது ஒரு செயலை அல்லது ஒன்றின் இருப்பை அல்லது ஒன்றின் நிலையைக் குறிக்கும் சொல்லாகும்.

Singular & Plural Words

ஒருமை மற்றும் பன்மை சொற்கள்

தமிழிலும் சரி, ஆங்கிலத்திலும் சரி, ஒன்றை அல்லது ஒருவிடயத்தை குறிப்பிடும் சொற்களை Singular (ஒருமை) எனவும் ஒன்றுக்கு மேற்பட்டவற்றை குறிப்பிடும் சொற்களை Plural (பன்மை) எனவும் அழைப்போம். 

Singular and Plural Nouns

ஒருமை மற்றும் பன்மை பெயர்ச்சொற்கள்

பெயர்ச்சொற்களைப் பொறுத்தவரை ஆங்கிலத்தில் ஒருமை மற்றும் பன்மை வடிவங்களில் எழுதும் போது பொதுவாக ஒருமை (Singular) வடிவத்துக்கு இறுதியில் 's' சேர்ப்பதால் அது பன்மை (Plural) வடிவமாக மாறிவிடுகிறது. 

உதாரணம்....

Car (கார்) என்பது ஒருமை, 

Cars (கார்கள்) என்பது பன்மை.

அதேபோல்,

Dog (நாய்) என்பது ஒருமை, 

Dogs (நாய்கள்) என்பது பன்மை.

ஆனால் எல்லாப் பெயர்ச்சொற்களுக்கும் இது பொருந்துவதில்லை. சில பெயர்ச்சொற்கள் ஒருமை வடிவத்தில் இருந்து பன்மை வடிவத்துக்கு மாற்றப்படும் போது இறுதியில் es, ies, ves சேர்ப்பதுடன் வழக்கத்துக்கு மாறான சில வடிவங்களிலும் மாறிச் செல்கின்றன.

உதாரணம்....

Class (வகுப்பு) என்பது ஒருமை.

Classes (வகுப்புகள்) என்பது பன்மை.

Baby (குழந்தை) என்பது ஒருமை, 

Babies (குழந்தைகள்) என்பது பன்மை.

Leaf (இலை) என்பது ஒருமை, 

Leaves (இலைகள்) என்பது பன்மை.

வழக்கத்துக்கு மாறான வடிவங்கள்...

Tooth (பல்) என்பது ஒருமை.

Teeth (பற்கள்) என்பது பன்மை.

Mouse (எலி) என்பது ஒருமை.

Mice (எலிகள்) என்பது பன்மை.

பெயர்ச்சொற்களை ஒருமையில் இருந்து பன்மைக்கு மாற்றும் போது எங்கே s சேர்க்க வேண்டும், எங்கே es, ies, ves சேர்க்கவேண்டும் என சில விதிமுறைகள் உள்ளன. 

சில பொதுவான விதிமுறைகள்...

 

ஒரு பெயர்ச்சொல் -ch, -x, -s, -sh ஆகிய எழுத்துக்களில் முடிவடையும் போது ஒருமையில் இருந்து பன்மைக்கு மாற்ற இறுதியில் es சேர்க்கப்பட வேண்டும்.

உதாரணம்....

box - boxes

class - classes

bush - bushes

church - churches

bus - buses

ஒரு பெயர்ச்சொல் இறுதியில் 'y' எனும் எழுத்தில் முடிவடையும் போது y எனும் எழுத்துக்கு முதலில் இருக்கும் எழுத்து ஒரு மெய்யெழுத்து (Consonant) எனின் அப்பெயர்ச்சொல்லை ஒருமையில் இருந்து பன்மைக்கு மாற்ற இறுதியில் உள்ள y எழுத்து துண்டிக்கப்பட்டு ies சேர்க்கப்பட வேண்டும்.

உதாரணம்....

party - parties

baby - babie

lady - ladies

ஒரு பெயர்ச்சொல் 'o' எனும் எழுத்தில் முடிவடையும் போது o எனும் எழுத்துக்கு முதலில் இருக்கும் எழுத்து ஒரு மெய்யெழுத்து (Consonant) எனின் அப்பெயர்ச்சொல்லை ஒருமையில் இருந்து பன்மைக்கு மாற்ற இறுதியில் es சேர்க்கப்பட வேண்டும்.

உதாரணம்....

potato - potatoes

tomato - tomatoes

இதற்கு விதிவிலக்கான சில சொற்களும் உள்ளன. உதாரணமாக photo எனும் சொல்லை பன்மையில் எழுதும் போது photos என எழுத வேண்டும்.

ஒரு பெயர்ச்சொல் f அல்லது fe எனும் எழுத்துக்களில் முடிவடையும் போது அப்பெயர்ச்சொல்லை ஒருமையில் இருந்து பன்மைக்கு மாற்ற இறுதியில் வரும் f  அல்லது fe எழுத்துக்கள் துண்டிக்கப்பட்டு ves சேர்க்கப்பட வேண்டும்.

உதாரணம்....

leaf - leaves

life - lives

இதற்கு விதிவிலக்கான சில சொற்களும் உள்ளன. உதாரணமாக proof எனும் சொல்லை பன்மையில் எழுதும் போது proofs என எழுத வேண்டும்.

இவ்வாறான விதிமுறைகள் மற்றும் சில விதிவிலக்குகள் இருப்பினும் அடிப்படையில் இருந்து ஆங்கிலம் கற்கும் ஒருவர் இவ்விதிமுறைகளையும் தாண்டி இவற்றை ஒவ்வொரு சொற்களாக நினைவில் வைத்துக்கொள்ள முயற்சிப்பதே நடைமுறையில் ஆங்கிலம் கற்றுக்கொள்ள இலகுவான முறையாகும்.

இவ்விதிமுறைகள் பற்றி விரிவாக மற்றும் விளக்கமாக தொடர்ந்துவரும் பகுதிகளில் கற்றுக்கொள்ளலாம். 

முக்கியம்:

ஆங்கிலத்தில் சில பெயர்ச்சொற்களை ஒருமையில் இருந்து பன்மைக்கு மாற்றி எழுத முடியாது. 

உதாரணம்....

India, Tamil, London, Love, Milk, Air போன்ற சொற்களை பன்மையில் எழுத முடியாது.

India எனும் பெயரில் உலகில் ஒரு நாடு மட்டுமே உள்ளது. Tamil எனும் பெயரில் உலகில் ஒரு மொழி மட்டுமே உள்ளது. ஆகவே இவற்றை பன்மையில் எழுத முடியாது. 

அதேபோல் Love (அன்பு), Milk (பால்) என்பவற்றை அன்புகள், பால்கள் என தொட்டு எண்ணிக்கையில் குறிப்பிட முடியாது. ஆகவே இவற்றையும் பன்மையில் எழுத முடியாது. 

பொதுவாக ஒரு விடயத்துக்கு மட்டும் உரித்தான பெயர்ச்சொற்களையும் (proper nouns), கணக்கிட முடியாத பெயர்ச்சொற்களையும் (uncountable nouns) நம்மால் பன்மை வடிவத்தில் எழுத முடியாது.

Singular and Plural Verbs

ஒருமை மற்றும் பன்மை வினைச்சொற்கள்

ஆங்கிலத்தில் ஒருமை மற்றும் பன்மை வினைச்சொற்கள் பற்றிய பகுதி மிக முக்கியமான பகுதியாகும். காரணம் இப்பகுதியை சரிவரப் புரிந்துகொண்டால் தொடர்ந்து வரும் பாடங்களைக் கற்றுக்கொள்வது மிகவும் இலகுவானதாக அமையும். 

நாம் மேலே ஒருமை மற்றும் பன்மை பெயர்ச்சொற்கள் (Singular and Plural Nouns) பற்றிக் கதைக்கும் போது, பொதுவாக ஒரு பெயர்ச்சொல்லின் ஒருமை (Singular) வடிவத்துக்கு இறுதியில் 's' சேர்ப்பதால் அதை பன்மை (Plural) வடிவமாக மாற்றலாம் எனப் பார்த்தோம்.  

ஆனால் வினைச்சொற்களில் (Verbs) அவ்வாறு செய்ய முடியாது. காரணம் ஆங்கிலத்தில் ஒரு வினைச்சொல் அதன் அடிப்படை வடிவத்தில் ஏற்கனவே நிகழ்காலப் பன்மையில் உள்ளது.

ஆங்கிலத்தில் ஒரு வினைச்சொல் (Verb) பிறக்கும் போது அல்லது புதிதாக உருவாக்கப்படும் போது அதன் அடிப்படை வடிவத்தில் நிகழ்காலப் பன்மையில் இருக்கும். ஆங்கிலத்தில் ஒரு வினைச்சொல்லின் அடிப்படை வடிவத்தை நாம் Base Form அல்லது Root Form என அழைப்போம். 

உதாரணம்....

Play, Come, Write, Read, Speak, Run, Work, Take ஆகிய சொற்கள் அடிப்படை வடிவத்தில் (Base Form இல்) உள்ளன மற்றும் அவை நிகழ்காலப் பன்மை (Plural) வடிவத்தில் உள்ளன.

இவற்றை ஒருமையாக மாற்றும் போது Plays, Comes, Writes, Reads, Speaks, Runs, Works, Takes என எழுதப்பட  வேண்டும்.

பொதுவாக ஒரு பெயர்ச்சொல்லை (Noun) ஒருமை வடிவத்தில் இருந்து பன்மை வடிவத்துக்கு மாற்ற இறுதியில் 's' சேர்க்க வேண்டும் எனப் பார்த்தோம். 

ஆனால் இங்கு ஒரு வினைச்சொல்லை (Verb) பன்மை வடிவத்தில் இருந்து ஒருமை வடிவத்துக்கு மாற்றவே இறுதியில் 's' சேர்க்க வேண்டும்.

வினைச்சொற்களிலும் சில சொற்களை பன்மையில் இருந்து ஒருமைக்கு மாற்றும் போது இறுதியில் s அல்லாமல் es, ies சேர்க்கப்பட வேண்டிய சில சந்தர்ப்பங்களும் உள்ளன. இவை பொதுவாக பெயர்ச்சொற்களை பன்மைக்கு மாற்றும் விதிமுறைகளுக்கு ஒத்தவையாகவே அமைகின்றன.

உதாரணம்....

Play என்பது பன்மை.

Plays என்பது ஒருமை.

Wash என்பது பன்மை.

Washes என்பது ஒருமை.

Try என்பது பன்மை.

Tries என்பது ஒருமை.

Miss என்பது பன்மை.

Misses என்பது ஒருமை.

Day 01 Grammar Lessons இல் நீங்கள் இறுதியாகவும், முக்கியமாகவும் நினைவில் வைத்துக்கொள்ள வேண்டிய விடயம் ஒன்று மட்டுமே. 

ஆங்கிலத்தில்,

• பெயர்ச்சொற்களை ஒருமை வடிவத்தில் இருந்து பன்மை வடிவத்துக்கு மாற்றும் போது இறுதியில் 's' சேர்க்க வேண்டும்.

• வினைச்சொற்களை பன்மை வடிவத்தில் இருந்து ஒருமை வடிவத்துக்கு மாற்றும் போது இறுதியில் 's' சேர்க்க வேண்டும். 

இது சரிவரப் புரியவில்லை என்றால், மீண்டும் ஒருமுறை Day 01 Grammar Lessons பகுதியை படியுங்கள்.